رسالة من مجهول

جتلى رسالة من مجهول على بريدى الإلكترونى يناقش فيها الكاتب الذى يصف نفسه بانه مفكر بعض الأفكار المتعلقة بالخطاب الدينى المعاصر فهو يطرح بعض الأفكار :

هو يقول فى رأيه ان الثواب والعقاب له اوزان متعدده ولما يكون فى حد تضرر من اى تصرف يبقى ده ذنب كبير على حسب درجة التضرر فمثلا انتى سرقت حاجة من واحد دى تعتبر مثلا ب 100 نقطة ذنب ، طيب انتى ركنت عربيتك وقفلت على واحد ومشيت دى مثلا ب 40 نقطة ذنب ، انتى ضربت الكالكس وازعجت مجموعة من الناس دى مثلا ب 20 نقطة ذنب ، انتى مثلا مووت واحد دى ب مالا نهاية من الذنوب والتفسير لكدة انو ربنا دا اله وعادل جدا وانتى لما تظلم حد اكيد الموقف مس هيا دى نهايتو لا زم فى فصل تانى يقتص فيه المظلوم أما العلاقة بينك وبين ربنا ففى رأى الكاتب ان دى ذنوبها قليلة جدا لأن ربنا غنى عن اى حاجة من عباداتنا يعنى مثلا الصلاة ب 5 نقط فتخيل بقى انتى اليوم كلوا عمال تصلى وفاكر نفسك تمام ولكن زوغت ساعة من شغلك فدى راحت قصاد دى ، ويقول الكاتب تخيلوا لو الناس بدات تفهم كده هل هتلاقى المرتشى بيروح يحج طبعا لأ ، لأن الحج ب 20 نقطة ثواب وكل رشوة بياخدها ب 80 نقطة ذنب .

لو بدأت الناس تفكر بالطريقة دى هتفهم ان الدين هو السلوك اللى بين الناس وبعضها وممكن يبدأ المجتمع ترجع فيه الأخلاق والقيم لكن دلوقتى الجوامع مليانة ناس والمجتمع زبالة لأن الناس فاهمة ان دى غير دى يعنى الدكتور يروح المستشفى ساعة واحدة يسلق كام عيان فى ثوانى ولكن اول ما يسمع الآدان دى حاجة تانى بقه يسيب كل اللى فى ايدو وجرى على الجامع ، بجد فكر غريب